2000-க்குப் பிறகு வேலைவாய்ப்பு அலுவலகத்தில் பதிவு செய்திருப்பவர்கள் தங்கள் பதிவுமூப்பு விவரங்களை முதுநிலை பட்டதாரி ஆசிரியர் தேர்வு விண்ணப்பத்தில் எப்படி குறிப்பிட வேண்டும்? என்று ஆசிரியர் தேர்வு வாரியம் விளக்கம் அளித்துள்ளது.

அரசு மேல்நிலைப் பள்ளிகளில் 2,895 முதுநிலை பட்டதாரி ஆசிரியர் பணி இடங்களை நிரப்புவதற்கான போட்டித்தேர்வு மே மாதம் 27-ந் தேதி நடைபெற உள்ளது. இதற்கான விண்ணப்ப படிவங்கள் அனைத்து மாவட்ட முதன்மை கல்வி அதிகாரி அலுவலகங்களிலும் கடந்த 16-ந்தேதி முதல் வழங்கப்பட்டு வருகின்றன.

வேலைவாய்ப்பு பதிவுமூப்புக்கு தகுந்தாற்போல் சிறப்பு மதிப்பெண்களும் உண்டு. இதற்கான விவரங்களை விண்ணப்ப படிவத்தில் குறிப்பிடுவதற்கு இடம் ஒதுக்கப்பட்டு உள்ளது. அதில் ஆண்டின் முதல் இரண்டு இலக்கங்களை குறிப்பிடும் வகையில் 19 என்று அச்சிடப்பட்டு அதற்கு பிறகு கடைசி இரண்டு இலக்கங்களை விண்ணப்பதாரர்கள் குறிப்பிடுவதற்காக இடத்தை ஒதுக்கி உள்ளனர். 1999-ம் ஆண்டுக்குள் பதிவு செய்தவர்கள் எவ்வித சந்தேகமும் இல்லாமல் குறிப்பிட்டு விடுகிறார்கள். ஆனால், 2000 மற்றும் அதற்கு பிறகு பதிவுசெய்தவர்களுக்கு பதிவு ஆண்டை குறிப்பிடுவதில் சந்தேகம் எழுந்த வண்ணம் உள்ளது.

இதுகுறித்து ஆசிரியர் தேர்வு வாரிய அதிகாரிகளிடம் கேட்டபோது அவர்கள் அளித்த விளக்கம் வருமாறு:-

முதுநிலை பட்டதாரி ஆசிரியர் தேர்வு விண்ணப்பத்தில் சிறிய அச்சுப்பிழை ஏற்பட்டுவிட்டது. ஓ.எம்.ஆர். படிவத்தில் அடித்துவிட்டு எழுதக்கூடாது. எனவே, 2000 மற்றும் அதற்கு பிந்தைய ஆண்டுகளில் பதிவு செய்தவர்கள் கடைசி இரண்டு எண்ணை மட்டும் அந்த இரண்டு கட்டங்களில் குறிப்பிட்டால் போதும். அதாவது 2000-ம் ஆண்டில் பதிவுசெய்தவர்கள் 19-க்குப் பிறகு 00 என்று குறிப்பிட்டால் போதும். அது 2000 என்று கம்ப்யூட்டரில் திருத்தம் செய்யப்படும்.

அதேபோல், 2010-ம் ஆண்டு பதிவு செய்திருப்பவராக இருந்தால் 19-க்குப் பின்னர் 10 என்று குறிப்பிட்டால் போதும். இந்த ஒரு காரணத்திற்காக எந்த விண்ணப்பமும் நிராகரிக்கப்படாது. முதலில் அச்சடித்த விண்ணப்பங்களில்தான் இந்த பிழை இருக்கும். அதற்குப் பிறகு அச்சடித்த படிவங்களில் இந்த பிழையை சரிசெய்துவிட்டோம்.

இவ்வாறு அதிகாரிகள் கூறினார்கள்.

https://goo.gl/Hgh2mh